ఏమిటయ్యా మీ తెలుగు గొప్ప..?

చిన్నప్పుడు మా స్కూల్లో "తెలుగువారికి ప్రత్యేక రాష్ట్రం"..గురించి చెప్తున్నపుడు, మా టీచరుగారు ఈ కథ కూడా చెప్పారు. (కథ కాబట్టి, జరిగిందో, జరగలేదో నాకు తెలియదని మనవి..!). పొట్టి శ్రీరాములు గారికి ముందు ఒకాయన అదే నినాదంతో నిరాహారదీక్షకి కూరున్నాడట..!

అప్పుడు కాంగ్రెస్‌ అధిష్టానం నెహ్రూనో, పటేల్నో పంపిందట (ఇప్పట్లాగే..!). ఆయనగారు, మన తెలుగాయన దగ్గరకొచ్చినపుడు అన్నాడట..

"ఏమయ్యా..! తెలుగో..! తెలుగో...! అంటున్నావ్‌..! అసలు మీ తెలుగువాళ్ళకి ప్రత్యేక రాష్ట్రం ఎందుకివ్వాలీ..? అసలు మీ తెలుగు గోప్పేంటీ..?"..అని

దానికీయన ఏమీ మాట్లాడకుండా, జేబులో ఉన్న "అణా"కాసుని తీసి చూపించాడట...! దాని మీద "one anna".."एक अना".."ఒక అణా"..అని మాత్రమే ఉన్నాయట..

అది చూపించి..ఈయన అన్నదిది. "తెలుగు గొప్పేమిటన్నావ్‌గా..! ఇదీ తెలుగు గొప్ప..! నువ్వు గుర్తించడం ఎవడిక్కావాలీ.. బ్రిటీషువాడే గుర్తించాకా..?"..అని..

అదీ కథ... సరే..! నిజంలోకి వస్తే, ఈ కథ నిజమో కాదోనన్న విషయం పక్కనబెట్టి, "అణా" కాసుల చిత్రాలను మొన్న అంతర్జాలంలో వెతకి, పట్టుకున్నాను. మీరూ చూడండి..!

వీటిలో దేవనాగరి, ఉర్దూ (అనుకుంటా..!), బెంగాలీ, తెలుగు లిపుల్లో ముద్రింపబడి ఉన్నాయి..!

ఒక అణా 

రెండు అణాలు

నాలుగు అణాలు

యెనిమిది అణాలు

అవిభక్త భారతంలోనే మూడవ అతి పెద్ద భాషగా ఉండేది మన తెలుగు..! 

ఇదికూడా మన తెలుగు గొప్పదనమే..!